விவசாயக் குடும்பத்திலிருந்து சர்வதேச தொழிலதிபராக… இளைஞர்களுக்கு ஊக்கமளிக்கும் திரு. A. துரைசாமியின் வெற்றிப் பயணம்!
ஒரு சாதாரண விவசாயக் குடும்பத்தில் பிறந்த இளைஞர், தனது கல்வி, உழைப்பு, தன்னம்பிக்கை, விடாமுயற்சி ஆகியவற்றை மட்டுமே மூலதனமாகக் கொண்டு உலகளாவிய தொழில்முனைவோராக உயர்ந்தால், அது ஒரு தனிநபரின் வெற்றிக் கதையாக மட்டுமல்ல; அடுத்த தலைமுறைக்கான வழிகாட்டியாகவும் மாறுகிறது. அத்தகைய ஊக்கமூட்டும் வாழ்க்கைப் பயணத்தின் சொந்தக்காரர் தான் திரு. A. துரைசாமி.
ஏழ்மையை வென்ற கல்வி!
1968 ஜூன் 29-ஆம் நாள் நாமக்கல் மாவட்டம், இராசிபுரம் அருகேயுள்ள பெரியூர் கிராமத்தில், விவசாயிகளான திரு. எர்ரப்பன் – திருமதி. பொம்மாயி அம்மாள் தம்பதியருக்கு மகனாகப் பிறந்தார்.
உள்ளூர் அரசு பள்ளியில் தொடக்கக் கல்வி கற்ற அவர், இராசிபுரம் அரசு மேல்நிலைப் பள்ளியில் பன்னிரண்டாம் வகுப்பில் பள்ளி முதல் மாணவராகத் தேர்ச்சி பெற்றார்.
குடும்பத்தில் முதல் பட்டதாரியாக உருவாக வேண்டும் என்ற பெற்றோரின் கனவை நனவாக்க வேண்டும் என்ற உறுதியுடன், தனது உயர்கல்வியை மிகுந்த சிந்தனையுடன் தேர்வு செய்தார். பல் மருத்துவம், விவசாயப் பொறியியல், பொறியியல் உள்ளிட்ட பல துறைகளில் சேர வாய்ப்பு கிடைத்தபோதும், எதிர்கால வளர்ச்சியை கணித்து இயந்திரவியல் (Mechanical Engineering) துறையைத் தேர்ந்தெடுத்தார்.
சேலம் பொறியியல் கல்லூரியில் B.E. (Mechanical Engineering) பட்டம் பெற்றார்.
திருமதி D. விஜயலட்சுமி B.Sc. (Computer Science) அவர்களைத் திருமணம் செய்து கொண்டுள்ளார். இவர்களுக்கு D. ஜனனி நாகஜோதி (Chemical Engineer) மற்றும் D. பிரமோத் என்ற இரு பிள்ளைகள் உள்ளனர்.
இந்தியாவில் இருந்து உலக நாடுகளுக்கு…
1989-ஆம் ஆண்டு பொறியியல் பட்டம் பெற்றதும், சென்னை Binny Engineering நிறுவனத்தில் பயிற்சி பொறியாளராக தனது பணியைத் தொடங்கினார்.
அதன்பின் அவரது தொழில்முறை வாழ்க்கை இந்திய எல்லைகளைத் தாண்டியது.
- Binny Engineering, Chennai (1989–1994)
- Larsen & Toubro (L&T), Surat – Reliance நிறுவனத்தின் Polymer Plant மற்றும் Offshore Platform திட்டங்கள் (1994–1996)
- John Brown Engineering, Bengaluru (1996–2000)
- Aker Kvaerner, Singapore (2000–2004)
- Petrokon Engineering Consultancy, Brunei (2004–2005)
- Thai Nippon Steel Engineering Corporation, Thailand (2005–2006)
இவ்வாறு இந்தியா, சிங்கப்பூர், புருனே, தாய்லாந்து உள்ளிட்ட பல நாடுகளில் சுமார் 17 ஆண்டுகள் உலகத் தரத்திலான அனுபவத்தைப் பெற்றார்.
வேலைவாய்ப்பிலிருந்து தொழில்முனைவோருக்கான துணிச்சலான பயணம்!
வெளிநாடுகளில் உயர்ந்த பதவிகளில் பணியாற்றியபோதும், "ஒருநாள் நாமே ஒரு நிறுவனத்தை உருவாக்க வேண்டும்" என்ற கனவு அவரை விட்டு விலகவில்லை.
தன் பிள்ளைகள் இந்தியச் சூழலில் வளர வேண்டும் என்ற விருப்பத்துடன் 2006-ஆம் ஆண்டு தாயகம் திரும்பி, சென்னையில் ஐந்து நண்பர்களுடன் இணைந்து VP Petro6 Engineers & Consultants Pvt. Ltd. நிறுவனத்தைத் தொடங்கினார்.
அனுபவம் இருந்தாலும், தொழில்முனைவு என்பது வேறுபட்ட உலகம். அலுவலகம், உள்கட்டமைப்பு, தொழில்நுட்ப வசதிகள், உயர்ந்த முதலீடு, கடுமையான சர்வதேச போட்டி என தொடக்க கால சவால்கள் ஒன்றன்பின் ஒன்றாக வந்தன.
நிறுவனத்தை நடத்துவதற்காக தங்களது சேமிப்பை முழுவதுமாக முதலீடு செய்தனர்.
ஆனால், 2010-ஆம் ஆண்டு ஏற்பட்ட பொருளாதார நெருக்கடியால் அவரது கூட்டாளர்கள் நிறுவனத்தை மூட முடிவு செய்தனர்.
தோல்வியை முடிவாக அல்ல… புதிய தொடக்கமாக மாற்றிய மனிதர்!
பலர் அந்த சூழலில் மீண்டும் வேலைக்குச் சென்றிருப்பார்கள்.
ஆனால் திரு. துரைசாமி வேறுவிதமாகச் சிந்தித்தார்.
"என் திறமை மீது எனக்கு நம்பிக்கை இருக்கிறது" என்ற மனஉறுதியுடன், கூட்டாளர்களிடமிருந்து விலகி அதே ஆண்டில் Petro6 Engineering & Constructions Pvt. Ltd. என்ற புதிய நிறுவனத்தைத் தொடங்கினார்.
அந்த முடிவே அவரது வாழ்க்கையின் மிகப்பெரிய திருப்புமுனையாக அமைந்தது.
மூன்றே ஆண்டுகளில் சர்வதேச விரிவாக்கம்!
விடாமுயற்சிக்கு வெற்றி தாமதமாக வந்தாலும், தவறாமல் வந்தது.
2013-ஆம் ஆண்டில் தனது நிறுவனத்தின் கிளையை சிங்கப்பூரில் தொடங்கினார்.
அடுத்த ஆண்டே மியான்மர் நாட்டிற்கும் நிறுவனத்தை விரிவுபடுத்தினார்.
மேலும், மியான்மர் மற்றும் வியட்நாம் நிறுவனங்களுடன் இணைந்து Alpha ECC Engineering & Construction நிறுவனத்தையும் நிறுவினார்.
இன்று அவரது நிறுவனங்கள் மூலம் 100-க்கும் மேற்பட்ட பொறியாளர்கள் பணியாற்றி வருகின்றனர்.
பன்னாட்டு நிறுவனங்களின் நம்பிக்கையைப் பெற்ற தமிழர்!
திரு. துரைசாமியின் நிறுவனங்கள் இன்று உலகின் பல முன்னணி நிறுவனங்களுடன் இணைந்து பணியாற்றி வருகின்றன.
அவற்றில் சில:
- ONGC
- Indian Oil Corporation (IOC)
- Cairn Oil & Gas (Vedanta)
- Oil India
- Petronas
- Total
- PTTEP
- Daewoo
- Nippon Steel
- Kuwait Oil Company
- Saudi Aramco
- Sapura Energy
எண்ணெய் மற்றும் எரிவாயுத் துறையில் இந்தியாவிலிருந்து உலக அரங்கிற்கு தன்னுடைய நிறுவனத்தை கொண்டு சென்றுள்ள தொழில்முனைவோர்களில் குறிப்பிடத்தக்கவராக திகழ்கிறார்.
இதுமட்டுமல்லாமல், தகவல் தொழில்நுட்பத் துறையிலும் கால்பதித்து BAssure மென்பொருள் நிறுவனத்தின் பங்குதாரராக இணைந்துள்ளார்.
விளையாட்டிலும் வெற்றியாளர்!
தொழில் உலகில் மட்டுமல்லாமல், கோல்ஃப் விளையாட்டிலும் சிறந்து விளங்குகிறார்.
சென்னை கிண்டி ஜிம்கானா கிளப்பின் உறுப்பினரான அவர், இந்தியா மற்றும் வெளிநாடுகளில் நடைபெற்ற பல போட்டிகளில் பதக்கங்களை வென்றுள்ளார்.
2017-ஆம் ஆண்டு Sportstar Magazine Amateur Golf Tournament போட்டியில் முதலிடம் பெற்று சாதனை படைத்தார்.
சமூகத்தின் மீதான அக்கறை!
சர்வதேச தொழிலதிபராக உயர்ந்த பின்னரும், தனது வேர்களை அவர் மறக்கவில்லை.
நாமக்கல் பகுதி மக்களின் பாரம்பரிய மரபுகளிலும், சமூக நிகழ்வுகளிலும் தொடர்ந்து பங்கேற்று வருகிறார்.
2014-ஆம் ஆண்டு சென்னை வீரபாண்டிய கட்டபொம்மன் இராஜகம்பள சமுதாய நலச்சங்கம் கட்டிடப் பணிகள் நிதி நெருக்கடியில் தடுமாறியபோது, உடனடியாக ₹2 லட்சம் நன்கொடையாக வழங்கி பணிகள் நிறைவடைய முக்கிய காரணமாக இருந்தார்.
அந்தக் காலகட்டத்தில், இராஜகம்பள சமுதாய வரலாற்றில் ஒரே தவணையில் வழங்கப்பட்ட மிகப்பெரிய தனிநபர் நன்கொடையாக அது அமைந்தது குறிப்பிடத்தக்கது.
அவரது பங்களிப்பின் அடிப்படையிலேயே "கட்டபொம்மன் பர்பிள் டிரஸ்ட்" உருவாக்கப்பட்டது.
இன்றும் அவர் சங்கத்தின் ஆலோசகராக இருந்து சமூக முன்னேற்றப் பணிகளுக்கு வழிகாட்டி வருகிறார்.
இளைஞர்களுக்கான ஒரு வாழ்க்கைப் பாடம்!
சர்வதேச அளவில் வெற்றிபெற்ற தொழிலதிபராக இருந்தாலும், எளிமையை தனது அடையாளமாகக் கொண்டவர் திரு. துரைசாமி.
பதவி, பணம், புகழ் அனைத்தும் கிடைத்த பின்னரும், "நானும் வளர வேண்டும்; என்னுடன் என் சமூகமும் வளர வேண்டும்" என்ற எண்ணத்தை இன்றும் தக்க வைத்திருக்கிறார்.
ஒரு விவசாயக் குடும்பத்தில் பிறந்த இளைஞர், உலகின் முன்னணி நிறுவனங்களுடன் தொழில் ஒப்பந்தம் செய்யும் அளவிற்கு உயர்ந்திருப்பது, கல்வி, கடின உழைப்பு, தன்னம்பிக்கை மற்றும் விடாமுயற்சி இருந்தால் எந்தச் சூழலையும் வெல்ல முடியும் என்பதற்கான உயிரோட்டமான எடுத்துக்காட்டு.
சாதிக்க வேண்டும் என்று கனவு காணும் ஒவ்வொரு இளைஞரும், திரு. A. துரைசாமியின் வாழ்க்கைப் பயணத்தை ஒருமுறை படிக்க வேண்டும். ஏனெனில், வெற்றி என்பது வசதியான குடும்பத்தில் பிறப்பதால் கிடைப்பதல்ல; விடாமுயற்சியுடன் தொடர்ந்து முன்னேறுபவர்களுக்கே அது சொந்தமாகிறது.
தொழில்துறையில் மேலும் பல சாதனைகள் படைத்து, உலக அரங்கில் இராஜகம்பள சமுதாயத்தின் அடையாளமாக தொடர்ந்து விளங்கிட திரு. A. துரைசாமி அவர்களுக்கு எங்கள் மனமார்ந்த வாழ்த்துகள்.
